Job 18

Bildadi Anasema: Mungu Huwaadhibu Waovu

1 ^aBildadi Mshuhi akajibu:
2 ^b“Je, ni lini utafika mwisho wa maneno haya?
Uwe mwenye busara, nasi ndipo tutakapoweza kuongea.

3 ^cKwa nini sisi tunafikiriwa kama wanyama,
na kuonekana wajinga machoni pako?

4 ^dWewe unayejirarua mwenyewe vipande vipande
katika hasira yako,
je, dunia iachwe kwa ajili yako wewe?
Au ni lazima miamba iondolewe mahali pake?

5 ^e“Taa ya mwovu imezimwa,
nao mwali wa moto wake umezimika.

6 ^fMwanga hemani mwake umekuwa giza;
taa iliyo karibu naye imezimika.

7 ^gNguvu za hatua zake zimedhoofishwa;
shauri lake baya litamwangusha.

8 ^hMiguu yake imemsukumia kwenye wavu,
naye anatangatanga kwenye matundu ya wavu.

9 ⁱTanzi litamkamata kwenye kisigino;
mtego utamshikilia kwa nguvu.

10 ^jKitanzi kimefichwa ardhini kwa ajili yake;
mtego uko kwenye njia yake.

11 ^kVitisho vimemtia hofu kila upande,
na adui zake humwandama kila hatua.

12 ^lJanga linamwonea shauku;
maafa yako tayari kwa ajili yake aangukapo.

13 ^mNayo yatakula sehemu ya ngozi yake;
mzaliwa wa kwanza wa mauti atakula maungo yake.

14 ⁿAtang’olewa kutoka usalama wa hema lake,
na kupelekwa kwa mfalme wa vitisho.

15 ^oMoto utakaa katika hema lake;
moto wa kiberiti utamwagwa juu ya makao yake.

16 ^pMizizi yake chini itakauka
na matawi yake juu yatanyauka.

17 ^qKumbukumbu lake litatoweka katika dunia,
wala hatakuwa na jina katika nchi.

18 ^rAmeondolewa nuruni na kusukumiwa gizani,
naye amefukuzwa mbali atoke duniani.

19 ^sHana mtoto wala mzao miongoni mwa watu wake,
wala aliyenusurika mahali alipoishi.

20 ^tWatu wa magharibi watashangaa yaliyompata;
watu wa mashariki watapatwa na hofu.

21 ^uHakika ndivyo yalivyo makao ya mtu mwovu;
ndivyo palivyo mahali pake mtu asiyemjua Mungu.”